Բացասական թվերի բաժանումը ունի նույն իմաստը, ինչ և դրական թվերի բաժանումը՝ տրված արտադրյալով և արտադրիչներից մեկով գտնում են երկրորդ արտադրիչը:
Օրինակ, -12-ը բաժանել -4-ի՝ նշանակում է գտնել այնպիսի x թիվ, որ-4 * x = -12:Երկրորդ արտադրիչը հավասար է 3-ի, քանի որ -4 * 3 = -12:
-12 թիվը բաժանելին է, -4 թիվը՝ բաժանարարը, իսկ 3 թիվը՝ քանորդը: Նկատենք, որ (3) = (-12) : (-4): Ստացվում է, որ քանորդի բացարձակ մեծությունը կարելի է գտնել՝ բաժանելիի բացարձակ մեծությունը բաժանելով բաժանարարի բացարձակ մեծության վրա: -12 բացասական թիվը -4 բացասական թվի վրա բաժանելիս քանորդում ստացանք 3 դրական թիվը: Այսպիսով՝-12 : (-4) = 3:Ընդհանրապես, բացասական թիվը բացասական թվի վրա բաժանելու համար պետք է բաժանելիի բացարձակ մեծությունը բաժանել բաժանարարի բացարձակ մեծության վրա:
Օրինակ.-81 : (-2.7) = |-81| : |-2.7| = 81 : 2.7 = 30:Կարճ կարելի է գրել՝-81 : (-2.7) = 81 : 2.7 = 30:Այժմ դիտարկենք տարբեր նշաններով թվերի բաժանումը:
Քանի որ -0.5 * 9 = -4.5, ապա -4.5 : 9 = -0.5:
Քանի որ -6 * (-4.5) = 27, ապա 27 : (-4.5) = -6:
Ուրեմն, տարբեր նշաններ ունեցող թվերի քանորդը բացասական թիվ է:
Ընդհանրապես, տարբեր նշաններ ունեցող երկու թվեր բաժանելու համար պետք է բաժանելիի բացարձակ մեծությունը բաժանել բաժանարարի բացարձակ մեծության վրա և ստացված թվի առջև դնել ‘-‘ նշանը:
Օրինակ. 3.24 : (-0.3) = - (3.24 : 0.3) = -10.8:
Զրոն զրոյից տարբեր ցանկացած թվի վրա բաժանելիս ստացվում է զրո:
Զրոյի վրա բաժանել չի կարելի:
Հավասարումներ լուծելիս հաճախ հարկ է լինում հավասարման երկու մասերը բազմապատկել զրոյից տարբեր միևնույն թվով կամ բաժանել զրոյից տարբեր միևնույն թվի վրա: Այդ դեպքում ստացվում է նոր հավասարում՝ նույն արմատներով, ինչ որ տրվածը:
Օրինակ 1. -2 թիվը 4 * (x + 5) = 12 հավասարման արմատն է: Այդ նույն արմատ ունի նաև x + 5 = 3 հավասարումը, որը ստացվում է 4 * (x + 5) = 12 հավասարման երկու մասերը 4-ի բաժանելով:
Օրինակ 2. Լուծենք -4x = 32 հավասարումը: Ըստ բաժանման իմաստի՝ x = 32 : (-4), x = -8: Այդ նույն արդյունքը ստացվում է, երբ -4x = 32 հավասարման երկու մասերը բաժանում ենք -4-ի:
Օրինակ 3. Լուծենք 0.1x = -8 հավասարումը: Հավասարման երկու մասերը բաժանելով 0.1-ի, կստանանք՝ x = -8 : 0.1 = -80: Նույն արդյունքը կարելի է ստանալ, եթե հավասարման երկու մասերը բազմապատկենք 10-ով: